Në fillim Pol Pogba me doping dhe pak më pas edhe një Nikolo Faxholi të varur nga bastet, i cili jo vetëm që kishte luajtur në disiplinën që përbën konflikt interesi, pra në futboll, por në të njëjtën kohë ai ka zgjedhur platforma pirate dhe jo ato të licencuara, duke fshehur kështu jo vetëm krimin sportiv, por në të njëjtën kohë edhe fshehje të ardhurash e taksash.
Gjithsesi, Faxholi tashmë e ka marrë dënimin e tij, por më shumë sesa të dy futbollistët, në këto momente vuajnë më shumë Masimiliano Alegri dhe “zonja e vjetër”. I pari, sepse tashmë e sheh mbulesën shumë të shkurtër në mesfushë dhe në janar ka nevojë të menjëhershme që të ndërhyjë “rrobaqepësi” Kristiano Xhuntoli për të marra masat e reja.
Madje, ky duket se ka nisur dhe është edhe në një stad të avancuar, duke qenë se sipas asaj që rakordojnë “Sportmediaset” dhe “Gazzetta dello Sport”, nga dita e djeshme kanë nisur të vijnë edhe “PO”-të e para nga ai që pritet të marrë përgjegjësi të mëdha në Torino.
Bëhet fjalë për Lazar Samarxhiç, mesfushorin e skuadrës së Udinezes, i cili teksa shkoi në selinë e Interit për të firmosur në verë, prishi akordin në sekondën e fundit.
Por Juventusi, nëse nuk ishte i bindur në gusht, duket se është bindur tashmë dhe Kristiano Xhuntoli ka marrë aprovimet e para, nga Udineze dhe vetë Samarxhiç për mundësinë e një transferimi në janar.
Futbollisti gjerman, por i natyralizuar serb, ndoshta nuk ka fizikun e Pol Pogbasë dhe goditjen e tij të fortë, por garanton prekje cilësore topi, goditje klasi dhe një driblim shumë fin.
Ndërkohë ka edhe elegancën dhe lojën vertikale që i garanton Nikolo Faxholi skuadrës së Alegrit, kështu që Samarxhiç duket vërtet një goditje e bukur për t’u finalizuar sa më shpejt.
Palët duken në sintoni totale, por tani Xhuntoli dhe 21-vjeçari i Udinezes duhet të nisin të bisedojnë pjesën më të rëndësishme të kontratës, aspektin ekonomik, por edhe këtu nuk priten probleme.