Të paktën një përforcim për janarin, por mund të ketë edhe dy. Një mesfushor për të zëvendësuar Pol Pogbanë, i pezulluar për doping, dhe një fantazist për të mbushur hapësirën e krijuar në qershor pas lamtumirës së Angel di Maria (tani te Benfika).
Shkurt, “Zonja e Vjetër” ka vendosur që të bëjë pak makijazh në merkaton e dimrit, e gjithë kjo për të zbukuruar pamjen e saj në shumicën e rasteve serioze, por edhe të shëmtuar në të tjera momente.
Përmirësimi i fytyrës së saj është edhe një nevojë, aq më tepër pas kësaj jave të fundit të Serisë A, e cila tregoi se jo vetëm bardhezinjtë janë 2 pikë larg Interit që dukej më shumë sesa i frikshëm, por edhe 4 pikë nga Milani kryesues.
Madje më 22 tetor, diçka përpara mesnatës, “zonja e vjetër” mund ta gjejë veten 1 pikë larg “djallit” në rast fitoreje duke u futur zyrtarisht në garën për titull. Dhe pikërisht për këtë arsye edhe makijazhi i muajit janar do të ishte një vlerë e shtuar për të tentuar këtë objektiv madhështor.
Emrat që mendohen se mund të zbukurojnë pamjen e Juventusit janë të shumtë, ndonëse në krye të listës qëndrojnë 3 të tillë.
DANEZI – I pari është Pierr-Emil Hojbjerg, emri që i pëlqen dhe mbi të gjitha bashkon edhe idenë e drejtorit Xhuntoli dhe trajnerit Alegri në lidhje me lojtarin për të zëvendësuar Pogbanë.
Danezi, i formuar te Bajerni i Mynihut dhe i hedhur në arenën kombëtare e ndërkombëtare nga Pep Guardiola, ka qenë një ndër të përkedhelurit e trajnerëve të mëparshëm si Mauricio Poçetino dhe Antonio Konte.
Por tashmë që ka ardhur “profesor” Postekoglu, i cili e ka dërguar Totenhemin në kryesimin e Premier Ligës, ai ka humbur papritur minutazhin, aq sa në 8 prezenca sezonale numëron vetëm 212 minuta.
Gjithsesi, ky fakt thjesht e ndihmon idenë e Juventusit për të arritur te objektivi i tyre, ndonëse londinezët nuk është se do të pranojnë të lënë të lirë 28-vjeçarin Hojbjerg, për më pak se 30 milionë euro.
ITALIANI – I dyti është gjithashtu një objektiv mëse i mundur. Madje, ai mund të kishte qenë pjesë e bardhezinjve në skuadrën aktuale, pasi kërkoi dhe u rebelua ndaj Sasuolos që ata ta linin të ikte në Torino, por situata dhe kohët u zgjatën aq shumë, sa në ditët e fundit kur u duk se edhe Sasuolo u dorëzua, nuk kishte më kohë që të plotësoheshin dokumentet e plota për transferimin, ndonëse kontrata mes Domeniko Berardit dhe Juventusit është gati dhe asaj i mungojnë vetëm firmat në të.
Mesfushori ofensiv dhe kapiteni i Sasuolos është lojtari që shihet për të bërë fantazistin në sulm, ose atë lojtarin që në fushë niset nga krahu i djathtë dhe më pas di sesi të kërkojë qendrën, duke tentuar edhe goditjet e tij të hidhura.
Dhe të mendosh se shënoi dhe festoi në fitoren fantastike të arritur ndaj Juves, vetëm tri javë më parë, me rezultatin 4-2. Por Kjo nuk do të thotë se ideja e tij nuk është që të shkojë në Torino.
Përkundrazi, ai festim ishte ndoshta edhe një çlirim për të, njësoj sikur të thoshte se herën tjetër, në janar pse jo, drejtuesit bardhezinj të mos vonojnë aq shumë për të arritur akordin me Sasuolon. Edhe në rastin e Berardit, vlera e kartonit rrotullohet te 30 milionë eurot.
UKRAINASI – Emri i tre në listë, por jo i fundit për nga rëndësia është një prej talenteve më të rinj ukrainas.
Bëhet fjalë për Georgi Sudakov, mesfushori i Shahtjor Donetskut, i cili pas shpërthimit në sezonin e kaluar, edhe sivjet e ka nisur me marshin e duhur duke regjistruar 534 minuta lojë në 8 ndeshje dhe duke gjetur rrugën e rrjetës në dy raste.
21-vjeçari pastaj përputhet më së miri edhe me planin e rinovimit që Juventusi ka vendosur që të nisë menjëherë pas mbërritjes në krye të merkatos së Kristiano Xhuntolit, i cili më shumë sesa për Berardin shtyn për Sudakovin, në rast se gjendet marrëveshja totale me Shahtjorin në merkaton e janarit.
TË TJERËT – Natyrisht që lista nuk mbaron këtu, përkundrazi mund të ketë edhe surpriza të tjera siç mund të jenë Kuadio Kone i Munshengladbahut (mesfushor francez 22-vjeçar), Jusuf Fofana i Monakos (mesfushor francez 24-vjeçar) apo edhe francezi tjetër, 19-vjeçari Habib Diarra i Strasburgut.