Protesta ka hyrë në ditën e 28-të, ndërsa qytetarët vijojnë të kërkojnë hetim dhe përgjegjësi penale për figurat më të larta politike në vend.
Një nga thirrjet kryesore të protestës mbetet: “Rama në burg, Berisha në burg”, si simbol i kërkesës për drejtësi pa dallim politik dhe pa mbrojtje institucionale.
Protestuesit kanë denoncuar publikisht raste që, sipas tyre, lidhen me grabitjen e pronave publike, korrupsionin e lartë, cenimin e interesit kombëtar dhe vendimmarrje në favor të grupeve të ngushta të pushtetit.
Por, pavarësisht 28 ditëve protestë, SPAK nuk ka dhënë ende një reagim të qartë publik për kërkesat dhe denoncimet e ngritura nga qytetarët.
Pyetja që shtrohet është e drejtpërdrejtë: a janë administruar këto denoncime? A janë verifikuar pretendimet për pronat publike dhe korrupsionin? A do të ketë hetim real, apo heshtja do të vijojë?
Protestuesit kërkojnë që drejtësia të veprojë pa standard të dyfishtë: as Rama mbi ligjin, as Berisha mbi ligjin, asnjë zyrtar mbi qytetarët.
Në ditën e 28-të, protesta vendos SPAK-un përballë një prove publike: të dëgjojë qytetarët dhe të hetojë pushtetin, ose të mbajë mbi vete peshën e heshtjes.