Mjekët, mësuesit dhe ushtarakë do të përfitojnë sërish në 2023-shin rritje page. Qeveria do t’i qëndrojë premtimit të saj për rritjen me 40 %, brenda mandatit të tretë, të pagave për mjekët, mësuesit dhe ushtarakët. Pagat për mjekët janë rritur me rreth 63% që nga 2013, ndërsa për mësuesit rreth 32 %.
Në projektbuxhetin për vitin 2023, fondi vjetor për rritjen e pagave është planifikuar në shumën 2.3 miliardë lekë dhe parashikon rritjen e pagës për funksion me 6% për punonjësit e sistemit shëndetësor dhe ata arsimorë. Nga ana tjetër, kryebashkiaku i Tiranës, Erion Veliaj, gjatë prezantimit të buxhetit të vitit të ardhshëm me banorët e Njësisë 9, ka folur dje për disa prej projekteve transformuese për Tiranën.
“Ne duam që të ndërtojmë një Muze të Artit Modern në Bulevardin i Ri. Qyteti sot ka mbi 1 milion banorë dhe nuk ka qytet të madh në botë pa një Muze të Artit Modern. Po ashtu, duam të ndërtojmë një qendër për konventat dhe konferencat sepse Pallati i Kongreseve nuk i përballon dot aktivitetet e shumta në Tiranë. Në Bulevardin e Ri duam të transferojmë edhe disa nga gjykatat, për shembull Gjykata e Lartë duket sikur është futur me lupë këpucësh te “Myslym Shyri”, u shpreh Veliaj. Tjetër projekt i rëndësishëm i përmendur nga kreu i Bashkisë është edhe ai i dy terminaleve të pasagjerëve, ai lindor që po ndërtohet në Lundër dhe terminali perëndimor te kthesa e Kamzës. Sa i takon buxhetit social, Veliaj tha se vetëm në Njësinë 9 kanë marrë kredi të buta 306 familje, ndërsa 140 të tjera trajtohen me bonus strehimi. Ai përmendi edhe rrugët që do të rikonstruktohen në Njësinë 9: “Do të ndërhyjmë fillimisht në 10 rrugë kryesore, siç janë “Papa Nikolla Papajani”, “Androkli Kostallari”, “Maksut Drasa”, “Ali Kukaleshi”, “Hasan Bakiu” etj., ndërkohë javën tjetër shpallim fituesit e çdo gare që ka hapur bashkia, për çdo njësi, lidhur me shtrimin e rrugëve, ndriçimin dhe sinjalistikën”, tha ndër të tjera Veliaj.