E shtuna ishte dita e parë e punës për Myzerim Zenelin. Fatkeqësisht, dhe e fundit e jetës së tij.
20 vjeçari humbi jetën nga përplasja me armë në Velipojë. I riu ishte në ditën e parë të punës, si kamarier në hotelin e familjes Gocaj, kur nga konflikti mes pronarëve të tij dhe atyre të hotel “Fantazia”, humbi tragjikisht jetën.
Ai ishte viktima më e pafajshme e asaj historie. Një djalë i rritur jetim, e që në xhep pas vrasjes i gjetën vetëm 30 lek. Atë natë nëna e tij ishte në punë, në lavanderinë e spitalit, ndërsa ai në vendin e tij të punës, te Hotel Gocaj.
Ngjarja e trishtë shokoi të madh e të vogël; një i ri i rritur pa baba por që kishte zgjedhur të ishte i ndershëm në jetë. Më e trishtë bëhet kjo ngjarje teksa dalin detaje të reja. Nëna e Myzerim Zenelit, kishte mësuar për vdekjen e djalit pak orë pas vrasjes së tij.
Teksa lante veshjet e spitalit, ajo kishte njohur peshqirin e djalit, Myzerimit, të larë në gjak.
“E ka kuptuar nga ora 1 e gjysmë, nga rrobat që duheshin larë në spital. Pa peshqirin e djalit, as që e dinte që te viktimat në morg ishte dhe Myzerimi. Ishte ‘shok’ i madh për të. Ka qenë shumë i dashur, pavarësisht se ka qenë pak i sëmurë. Kanë qenë të varfër, jetë e vuajtur. Ai ka pasur punë të jeta, ka punuar diku kamarier, diku diçka tjetër. Gatimin e ka mësuar në shkollë, e kishte pasion”, ka thënë kushëriri i Myzerim Zenelit.