Policia sekuestroi kompjuterë dhe blloqe shënimi ndërsa bastisi shtëpitë dhe zyrat e gazetarëve të agjencisë kurde të lajmeve në gjashtë qytete, duke arrestuar të paktën dhjetë gazetarë për arsye të panjohura.
Policia turke ndaloi të paktën dhjetë gazetarë kurdë nga agjencitë e lajmeve Mezopotamya dhe Jin në gjashtë qytete të ndryshme të martën në mëngjes.
“Si pjesë e një hetimi të nisur nga Zyra e Kryeprokurorit Publik të Ankarasë, bastisjet në shtëpi u kryen në shumë qytete”, raportoi Agjencia e Lajmeve Jin.
Agjencia e lajmeve tha se dyert u hapën me dhunë dhe gazetarët u morën me pranga pas shpine.
Arsyeja e operacionit dhe detajet e hetimit nuk janë bërë të ditura nga autoritetet turke.
Agjencia e Lajmeve Mezopotamya tha se gazetarët e saj u trajtuan brutalisht nga policia, fizikisht dhe verbalisht.
“Policia konfiskoi kompjuterë, blloqe, gazeta, revista kurde, karta identiteti dhe më shumë se 100 libra të gjetur në një shtëpi”, raportoi Mezopotamya.
Gazetarët e arrestuar janë Diren Yurtsever, Selman Guzelyuz, Emrullah Acar, Hakan Yalcin, Berivan Altan, Zemo Aggoz dhe Ceylan Sahinli nga Agjencia e Lajmeve Mezopotamya dhe Habibe Eren, Oznur Deger dhe Derya Ren janë nga Agjencia e Lajmeve Jin, njoftoi Unioni i Gazetarëve të Turqisë.
Më korrik, 16 gazetarë kurdë u arrestuan nga policia në qytetin e Dijarbakirit dhe u mbajtën në paraburgim pa u dhënë asnjë arsye.
Prokuroria ende nuk ka ngritur aktakuzë dhe gazetarët mbeten në burg pa e ditur arsyen e arrestimit.
Gazetarët dyshojnë se të arrestuarit të martën mund të kenë një fat të ngjashëm.
“Ndalimi i gazetarëve në operacionet e agimit në këto ditë kur ligji i censurës hyri në fuqi është një përpjekje për të kriminalizuar profesionin”, tha Ulku Sahin, një avokat nga TGS.
Sahin po i referohej një ligji të ri për dezinformimin që synon të rrisë kontrollin e qeverisë mbi shtypin dhe mediat sociale. Organizatat e medias dhe grupet e të drejtave e kanë dënuar atë si një sulm ndaj asaj që mbetet nga liria e medias në Turqi.
Sipas Komitetit për Mbrojtjen e Gazetarëve, Turqia mbetet një nga “burgosëset më të këqija të gazetarëve në botë”, dhe vazhdon të ushtrojë presion mbi mediat përmes çështjeve gjyqësore, gjobave dhe dënimeve me burg.
Turqia u rendit në vendin e 149-të nga 180 vende në botë në vitin 2022 në indeksin e fundit të lirisë së shtypit të publikuar nga organizata Reporterët pa Kufij, e cila e klasifikon kontrollin e qeverisë turke mbi organet e medias si të lartë.